سایت خوزستان چه خبر

شیخ ابراهیم الدیراوی

لا لا يمّه أوداعت خالي أوداعت خوّتكم ما أرجع
أوداعت جدنه و صندوگ الساج و نجمات البيهه امرصّع
أوداعت سجادة جدتنه و تربتهه و محبسهه اليلمع
أوداعت تفگة عمي السمره الما خانته ابشده و مفزع
أوداعت ذاك الشال المگوار ابساعتهه و هد عل مدفع
أوداعت هاونه و هوساته اليطرب ليهن كلمن يسمع
أوداعت گعدات أمضايفنه او كل خيّر بيهن يتربّع
أوداعت نخلات البديره اتموت ابعزتهه و ما تخضع
أزحف للموت اعله اركبّي و لو جسمي اعله الحگ يتگطّع
ما گولن آخ امن اصوابي و عيب اترف اعيوني و تدمع
عندي النار أحله امن الجنه بس لا دنگ بس لا أركع
ما ريدن جنتك رضوان ما ريدن واحد يتشفّع
للنار أدخل شايل راسي و تكارب وي مالك وطلع
لا لا يمّه أوداعت شطنه أوداعت ذيچ الدهله السمره
أوداعت غيم اليمطر خير اعله اربوع الأهواز الخضره
أوداعت كارون المن يزعل ياخذ كل الدنيّه ابصدره
أوداعت عرگ امساحينه المن تغرم بصّامل و تهبره
أوداعت حبّات السنبل الّي تضحك للگمره
أوداعت دورگنه الما دنّگ راسه و هبط يوم ابعمره
أوداعت عبّادان الشايع بين الوادم صيته و ذكره
أوداعت گاع الدوم اتهوّس مو خرمشهر آنه امحمّره
أوداعت كل ذرّه ابهل گاع من جدم الخاين تتبرّه
أيموت الواحد من عدنه او تبگه احچايته اتهوس يم گبره
اطش الهمّه ابكل الدنيّه انصيح احنه الفجّرنه الثوره
احنه الهبنه امن الكوخ اعله الطاغوت انهدّم قصره
احنه الصحنه ايموت ايزيد و نصاره و عاش ابن الزهره
او طافت عين الكرخه او صارت اقوي امن عيونچ يل بصره